答案：男既肌肉、女既曲線盡顯現！omg！由髮尾至腳板底，再由面衫至底褲全部濕哂！
原本有十六人到丫！不過，三號風加黃雨都幾趕客啦！最後得十一人出賽！都叫唔差啦！我一個人好早去到賽車場先，本想去影吓相，但落住毛毛雨，費事壞機！之後人慢慢、慢慢來齊！其實真係好慢，我同第二批到既相差九個字，同最後個批相差一個鐘三個字...
天氣開始差，個車場負責人話原來天文台話有機會會掛八號風... 佢問大家想點？可以 postpone；亦可以玩住先，如一掛就會即停而比番 coupon 我地下次用番。我呢 d 打死罷就既當然話玩玩玩！一場入到去無雷公咁遠，死都要玩！恐懼同拗底係唔存在係我字典入面既！
因為落雨關係，個負責人準備左好多便利雨衣，加上個賽車頭笠，我地一個二個就變成左好有趣既塑膠阿蓋達人... 講真，遮住果樣，ryan 同 ian 真係靚仔左！
第一場一開車就知玩法同之前好唔同！本身車已經係光頭軚，再加埋落雨地濕！唔好講笑！差唔多係彎都甩！不過雨唔太大，風力亦麻麻地，心諗，「超！又話八號！吹水啦！」輕輕鬆鬆係十一人攞個最快圈速同最多圈(十一個)既紀錄！其實我覺得自己麻麻地！因為太濕，好多鬆夾彎都甩得太多了！
休息一陣第二場。天氣真係差左好多，好大雨，不過都叫 manageable。便利雨衣經過咁嚴俊又科學既考驗，測試結果係：好得！個身就係都仲好乾，但係件衣雨扲唔到既腳就濕到出汁，好出色！今次好丫，有十二個圈同快左四秒幾。當然又係第一名啦！因為 d 彎同架車脾性都熟左啦！ :P
第二場完左休息期間，天地風雲變色，見到 d 葉、樹枝同石仔漫天亂飛，雨落到同 niagara falls 無咩分別，大家都靜哂諗緊點好。其實只要有人出聲話「玩」或者「唔玩」，大家都會附和。我見無人出聲，我問「大家拗唔拗濕身先」「超我地都濕哂啦」「怕唔怕比炒車」「no」「咁最恐怖都係如果有一塊葉係最奧妙既角度加上八級風力一野切斷你地頸大動脈者，咁不如去馬啦」「當然」... 凝聚力咪係呢 d 囉，領袖咪係呢 d 囉... (爛玩乍？)
我地決定之後，怪事發生。就係個負責人入休息室同我地講，「我都真係比你地對賽車既熱誠打動左，你地繼續啦，我交代左，我地既同事會全力支援你地，不過我會走先...」... 嘩！我同其他人講，真係好似事有 qk... 會唔會之後出現王晶個 d 快鏡 shot，見到佢架車 chu 一聲後倒而高速離開...
第三場賽車簡真係妙... 視野差，大量積水，石仔亂飛，便利雨衣亦測試出 max 抵擋風力係3號波而唔係8號而吹爛... 真係知道8號來了！因為無左雨衣關係，大家可以想像同著住衫沖涼完全無分別，衫褲痴實 d 肉，對鞋一踩油門就有熱水供應。我好彩著運動褲，其他同事著牛記...
因為視野差同車軚咬地變差，但係佢地仲用番之前既態度揸... 衝出跑道，完全失控，打白鴿轉... 咩意外都出哂... 好多交通意外就好似黎嬰果單咁，都係司機自己本身好小心，但其他司機唔小心... 我咪就係咁賴野。三次，係三次比人中腰撞出跑道。有一次仲要好似 mario kart 搵到 shortcut 咁，唔行車路行草地成架車比人撞左出去，超快既 shortcut... 草地上既觀眾(工作人員)雞飛狗走，同打機一樣...
勁好玩！玩完全部人濕到呢！邊個有大肚腩，call 機腰，一望就知... 當然仲有.... :)~三場結果... 攞到個第二名！開心啦！有個杯丫！
勁開心勁好玩！大家都攰到撻皮！亦都超級肚餓！不過佢地約哂一齊去屯門食 tea (lunch？) 但我就好堅咁仲去左打兩個鐘羽毛球... 仲要唔食野！咕咕~~
沒有留言:
發佈留言