雞毛蒜皮... 飽飽飽！

計下計下b仔都出左好一段時間囉~ 今年都派得叫唔錯啦。其實派得好與壞都一早打算一派就請屋企人食餐好啦！叫老媽搵埋阿姨一家啦，舅父一家啦，加埋我地自己一家啦！夾左好耐至夾到今日先去食。諗左好耐唔知食咩好，記起之前食過既小南國。其實自己係中環食過數次，絕對價錢唔平但亦肯定交足貨囉。不過點都好，都係覺得megabox果間夾屋企人住處多d。

之前訂位已經訂左三個要時間prepare既菜。個湯真係幾貴啦，七舊水十個人左右。我地有成十幾人so我要左個半既份量。仲有一隻八寶鴨同陳皮雞。

去到原來佢地好好咁安排一間私人房比我地！好正好好！個上海藉伙記亦非常之好傾同好服務。因為佢係上海人，每個菜佢都可以介紹下有咩特色，正！一個好既伙記真係可以幫間舖頭搵生意囉！

我除左果三個訂左既菜，再加一個十人餐另將某d菜既份量加大另再加幾個菜。齋係d冷盤既精美同好食程度，大家都讚不絕口，不住起筷同起機(相機影相)！食完個成七八碟冷盤，佢地以為差唔多完事... 唔係認為我會對人咁差丫麻？個伙計收好碟後，每人比左一隻成隻手掌曲埋咁大既蝦... 超多羔超好味！食到大家lamlamlei時，再來一個松子黃魚同個八寶鴨。松子黃魚唔洗講，黃花呢種又滑又甜既魚再加埋惹味酸甜汁... :P 個八寶鴨除左有個鴨頭同頸，真係估唔到係一隻鴨。原來師傅先去骨再加上八寶飯入去鴨身入面，再攞隻鴨成隻去酥炸，連阿恒咁鬼麻煩食野既人都話d野食樣樣都好好味！

大家已經飽飽地時，突然來一個東坡肉款既肥肥地既肉同廿幾個包包。個個話肥肉丫！唔食丫！會胆固醇丫！好飽丫！... 阿豪後生細仔就先來一件肉加好多汁放入個包入面... 一食... 話超級好味... 之後韻芝亦忍唔到佢阿哥既講法，唔食肥豬肉既佢亦來左一個包包加肉同汁，亦係話超好味！最後，之前最大聲話肥肉既六姨，會係個盤入面搵d肉來食！清碟！ :P

食完呢幾個菜，上個响螺頭湯。阿豪話超好飲而飲左兩大碗！超甜超香，並唔係普通食到既响螺湯味道，好鮮味！食到呢度，大家其實飽左九成。但個伙計再上果一早訂左既陳皮雞！D雞肉腍到我一夾個脾會成支骨卜聲跌落來。好香陳皮味！不過都係食唔到啦，隻雞食得三成左右所以爸爸叫伙計包左佢啦！

食左咁多肉，終於上蔬菜啦。百葉小唐菜實無走雞啦，仲有一個伙計推介而外加既時令蒜茸炒菜。伙記話菜叫雞毛菜，係上海人至會種既。我話菜叫雞毛，又用蒜炒，仲唔係雞毛蒜皮...？ :D 其實大家都真係飽得好厲害，但之後再來十幾個小籠包。好彩阿豪阿立同韻芝勁鍾意食，唔係真係小籠包都要打包囉！

本來要上甜品，但伙記話個甜品要耐少少時間準備，食水果先好唔好！當然好啦！食少少清清地既可以透透氣啦！

大家坐下透下氣，一路睇住十萬火急，吹下水，再慢慢等個甜品上來。其實連我在內都估唔到個甜品既精美程度可以去到咁... 大家一見個碟上枱，馬上嘩聲四起再起機！一個碟有廿幾粒甜點心，有五個款色：

1.桂花糕，伙計話係加左少少酒(唔記記係高梁定咩啦)，好香好煙靭，我超鍾意食桂花糕，但咁好味真係未試過啦！
2.煎堆仔，相對好普通既樣。但入面係我好鍾意既麻茸餡。剛剛炸好既煎堆，加上煙煙靭靭既皮，超好食！
3.南瓜糕，d皮加上南瓜肉來整出甜味。再做番一個南瓜樣，好靚丫~~ :P
第4同第5伙記話係得奬作品！要用好多心機用手工至做到出來！啡色既合桃，將合桃磨碎入D粉入面再猜番個合桃樣出來再攞去炸。白色既花生，同合桃一樣，不過今次用花生再整番個花生樣。兩個點心既香口同美味程度真係無得頂！

大家其實好飽囉！但呢碟甜點心真係曱甴一掃光！大家好勁啊！

大家食得好開心啦！一家人開開心心一齊食飯真好！爸爸話好貴丫！我話好少事啦，又唔係日日食，諗都唔好諗我成日請咁貴既野食啦.... :D


(其實食時有少少唔開心... wish you were here..... :( )